Isbahaysiga lagu sameeyay Asmara oo sheegay in ay Jabuuti u tageen in ay la kulmaan QM balse indhaha ay iska eegayeen wafdiga dowladda federaalka ah qolka shirka ka soconaya Jabuuti. Ruunkinet 13/05/08

Shir uga furmay magaalada Jabuuti dowladda federaalka ah iyo Isbahaysiga lagu soo dhisay magaalada Asmara ee dalka Eritreya ayaa la sheegay in uu weli ka socdo magaalada Jabuuti.

Shirkan oo ay soo qaban qaabisay QM ayaa waxaa ka soo qeyb galay wufuud aad u ballaaran oo ka kala socda wakiilada u fadhiya beesha caalamka magaalada Jabuuti iyo qaar kale oo ka yimid dalalkooda.

Shirkan oo laga damacsan yahay in lagu heshiisiiyo mucaaradka iyo dowladda federaalka ah ee Soomaaliya ayaa la sheegay in Isbahaysiga dib u xureynta ku dhawaaqay in aysan la kulmi dooni wafdiga dowladda federaalka ah ee ka qeyb galaya shirka Jabuuti.

Labada wafdi oo ka wada qeyb galaya shirka Jabuuti ayaa la sheegay in ay iska eegayaan indhaha oo kali ah balse aysan jirin xitaa salaam dhex martay labadooda inta lagu jiray fadhiga shirka.

Isbahaysiga ayaa sheegay in uu Jabuuti u tagay in uu la kulmo QM mas’uuliyiin ka socota balse uusan u tagin halkaasi in uu ka kulmo wafdiga dowladda federaalka.

Arrintan ayaa noqon karta fursaddii ugu dambeysay ee ay ku wada hadli karaan dowladda federaalka ah iyo isbahaysiga sida ay sheegeen mas’uuliyiinta QM uga qeyb galeysa kulanka Jabuuti.

C. Cali, Ruunkinet, London